Претседателката Гордана Сиљановска-Давкова денеска во Будимпешта оствари средба со претставници на македонската дијаспора, во рамки на посетата по повод одбележувањето на 70-годишнината од Унгарската револуција од 1956 година.
На средбата присуствуваа претставници на македонската заедница кои работат во областа на бизнисот, науката, образованието, информатичките технологии, како и студенти. Тие ја информираа претседателката за нивниот ангажман во унгарското општество и за актуелните состојби во земјата.
Во разговорите беше истакната потребата од понатамошно унапредување на македонско-унгарските односи. Претставниците на дијаспората предложија поголема промоција на Македонија пред унгарската јавност, интензивирање на културната соработка, развој на туризмот и отворање културни центри во двете земји.
Сиљановска-Давкова нагласи дека одржувањето постојана комуникација со дијаспората преку македонските дипломатско-конзуларни претставништва е од особено значење за јакнењето на врските со иселениците и за афирмацијата на државата во странство.
Претседателката изрази задоволство од угледот што македонската заедница го ужива во Унгарија и ја истакна важноста на културната дипломатија, поздравувајќи ја нивната посветеност во зачувувањето и промоцијата на македонскиот јазик, култура и традиција.
