Либерално-демократската партија предупредува на сериозни проблеми во правосудниот систем, посочувајќи дека недостигот од судии и обвинители, како и недоволното финансирање, довеле до натрупување на над 134.000 нерешени предмети.
Од ЛДП, повикувајќи се на единаесеттиот Извештај во сенка за Поглавјето 23 на Институтот за европска политика, обвинуваат дека власта бара ефикасност од правосудните институции, но истовремено не обезбедува услови за нивна независна и квалитетна работа.
Според податоците што ги наведува партијата, 18 од вкупно 34 судови се соочуваат со проблеми во ажурноста, а дел од обвинителствата функционираат без ниту еден јавен обвинител.
Како дополнителен проблем го посочуваат и поништувањето на огласот за прием на 130 кандидати во Академијата за судии и јавни обвинители, за што велат дека причина биле необезбедените финансиски средства од Министерството за финансии.
Од ЛДП тврдат дека за судската власт се издвојуваат само 0,26 проценти од БДП, иако законската обврска предвидува 0,8 проценти.
Претседателката на партијата, Моника Зајкова, оцени дека ваквата состојба покажува кои се вистинските приоритети на Владата.
„Очигледно, за власта има пари за функции, но нема пари за правда!“, порача Зајкова.
ЛДП реагира и на изјавите на високи владини функционери поврзани со конкретни истраги и судски постапки, оценувајќи дека таквите јавни настапи можат да создадат притисок врз обвинителството и да ја нарушат независноста на институциите.
Од партијата проблемите во правосудството ги поврзуваат и со измените на Кривичниот законик, за кои тврдат дека придонеле за застарување на предмети поврзани со висока корупција.
ЛДП бара итно обезбедување на потребните средства за судската власт, продолжување на приемот во Академијата за судии и јавни обвинители, намалување на непотребните административни трошоци и гарантирање на независноста на обвинителството.
Партијата повикува и на ревизија на кривичното законодавство и воспоставување одговорност за случаите на висока корупција.
