Претседател на Комисијата за образование и наука на СДСМ Јованче Манасков обвини дека за време на ученичка екскурзија во Монте Карло, директорката на Регионалниот центар за стручно образование и обука „Ѓорѓи Наумов“ од Битола, Жанета Сервини, и помошник-директорот Љупчо Здравковски наводно се коцкале во казино, додека учениците ги чекале во холот.
Партијата објави снимки со заматени ликови од малолетните ученици на која, како што тврди СДСМ, директорката и нејзиниот помошник играле на слот-машини во казино наместо да се грижат за безбедноста на учениците за време на екскурзијата.
Манасков ја повика министерката за образование и наука, Весна Јаневска, итно да спроведе надзор и да поведе постапка за утврдување одговорност и разрешување на инволвираните лица.
