Владата го усвои Предлогот за измени и дополнувања на Буџетот за 2026 година, со кој се предвидува прилагодување на приходите и расходите поради фискалните ефекти од владините мерки за поддршка на граѓаните и стопанството.
Како што информираат од Владата, измените се поврзани со намалувањето на акцизата и данокот на додадена вредност кај горивата, што влијаеше врз буџетските проекции.
Со новите пресметки, вкупните приходи се планирани на 374,2 милијарди денари, додека расходите се проектираат на 420,5 милијарди денари. Буџетскиот дефицит, според предлогот, останува на истото ниво.
Целта на измените, според извршната власт, е зачувување на стабилноста на јавните финансии, обезбедување непречено функционирање на институциите, реализација на планираните програми и навремено исполнување на финансиските обврски.
Предлогот за измени и дополнувања на Буџетот за 2026 година ќе биде доставен до Собранието, каде што ќе биде разгледан во понатамошна постапка.
