Бугарската претседателка Илијана Јотова порача дека европскиот пат на Македонија не може да се движи преку ултиматуми и политички условувања, туку преку дијалог и почитување на преземените обврски.
Коментарот на Јотова доаѓа по барањето испратено од македонските власти за билатерална средба меѓу претставници на двете земји.
Јотова, која присуствувала на одбележувањето на 114-годишнината од ослободувањето на Горна Џумаја во Благоевград, изјавила дека е умерен оптимист и дека ќе побара од бугарската министерка за надворешни работи Велислава Петрова-Чамова да го разгледа барањето за средба во Софија.
Таа истакнала дека не ги знае деталите од разговорот меѓу претседателката на Европската комисија Урсула фон дер Лајен и премиерот Христијан Мицкоски, но изразила надеж дека европската позиција била јасно пренесена.
„Мицкоски мора добро да ја прочита европската политика во однос на проширувањето на Македонија и да заборави дека ова е билатерално прашање, како што се обидува да го претстави. Ние секогаш сме биле отворени за разговори, но без ултиматуми и без отстапување од европската политика“, изјавила Јотова.
Според неа, Бугарија како членка на Европската Унија не може да прифати земја која се движи кон членство да не ги прифаќа европските вредности и принципи.
Во однос на спорот меѓу двете земји се огласи и лидерот на ГЕРБ и поранешен бугарски премиер Бојко Борисов, кој порача дека треба да се почитуваат Договорот за добрососедство и пријателство и договорените европски услови.
„Не бараме ништо повеќе од почитување на договорот. Ние не сме непријатели, туку напротив“, изјавил Борисов.
Тој додал дека со Договорот за добрососедство и францускиот предлог, според него, прашањата се јасно дефинирани.
Во меѓувреме, премиерот Христијан Мицкоски информираше дека сè уште нема одговор на барањето за билатерална средба што Министерството за надворешни работи и надворешна трговија го испратило до бугарската страна.
Мицкоски изјави дека доколку средбата биде одбиена, тоа би ги потврдило сомнежите што ги има македонската страна, но додаде дека не очекува таков исход.
Иницијативата за средба следуваше по разговорот меѓу Мицкоски и претседателката на Европската комисија Урсула фон дер Лајен за европската интеграција на Македонија.
