Силното невреме што веќе неколку дена го зафаќа грчкиот остров Крит предизвика нови поплави во поширокото подрачје на Иерапетра, поради што грчката противпожарна служба превентивно евакуираше 47 туристи од хотели и апартмани во областите Ферма и Куцунари.
Според грчките власти, обилните врнежи и понатаму создаваат сериозни проблеми, а поплавени се повеќе патишта во регионот. Преку системот за итни известувања 112 повторно беше испратен апел до граѓаните и туристите да го ограничат движењето и да ги следат упатствата на надлежните служби.
Од противпожарната служба информираат дека евакуираните туристи се префрлени на безбедна локација и дека нема повредени или лица во животна опасност. Во акцијата учествуваат пожарникари од Иерапетра и специјализирани спасувачки тимови.
Во текот на вчерашниот ден беа евакуирани уште 20 лица во околината на Иерапетра, како и две лица во близина на Ретимно. Дополнително, крајбрежната служба со чамци спаси четворица британски туристи од морскиот дел кај Иерапетра.
Голем број пожарникари и понатаму се распоредени низ Крит, а сите надлежни служби остануваат во состојба на зголемена готовност поради опасноста од нови поплави.
Невремето веќе однесе една човечка жртва. Во четвртокот животот го загуби 80-годишен сточар, додека две лица беа полесно повредени кога мост се урна поради лизгање на земјиштето во моментот кога минувале со автомобил.
Поради екстремните временски услови, островот Крит од средата вечер е ставен под највисоко ниво на тревога – „Црвен код“, што останува во сила поради ризикот од нови поројни дождови и поплави.
