Премиерот Христијан Мицкоски најави дека во наредните една до две недели ќе следуваат нови кадровски промени во вториот и третиот ешалон на власта, кои ќе ги опфатат позициите на заменици-министри и директори.
Тој посочи дека веќе има јасна претстава за кадровските решенија, но дека тие најпрво треба да бидат усогласени со коалициските партнери.
„Отприлика знам што, каде и како. Потребно е коалициски да потврдиме и тоа ќе се случи во наредната недела или две“, изјави Мицкоски, одговарајќи на новинарско прашање.
Најавените промени доаѓаат по јулската реконструкција на Владата, кога беа направени измени на повеќе министерски функции. Тогаш премиерот најави дека прашањето за заменик-министрите ќе биде разгледувано во текот на есента.
Засега не се соопштува кои заменици-министри и директори ќе бидат заменети, ниту кои кандидати се разгледуваат за нивни наследници. Повеќе детали се очекуваат по завршувањето на коалициските консултации.
