Малолетен пешак од Скопје се здобил со тешки телесни повреди во сообраќајна несреќа што попладнево се случила на улицата „Славеј Планина“ во главниот град.
Според информациите од полицијата, незгодата се случила околу 16 часот, кога дошло до судир меѓу автомобил „ауди“ со скопски регистарски ознаки, управуван од 25-годишниот Б.С., и малолетниот пешак.
По ударот, детето било повредено и веднаш со возило на Итната медицинска помош било пренесено во Ургентниот центар „Мајка Тереза“. Лекарите констатирале тешки телесни повреди.
За случајот бил известен јавен обвинител, а по негови насоки возилото било одземено поради сомнение за сторено кривично дело „безобѕирно управување со моторно возило“.
Од полицијата информираат дека по целосното документирање на случајот против возачот ќе биде поднесена соодветна кривична пријава.
