Селекторот на швајцарската репрезентација, Мурат Јакин, смета дека неговата селекција заслужила поубедлива победа против Македонија, иако натпреварот во Скопје заврши со сигурен триумф од 3:0.
Швајцарците од самиот почеток го контролираа натпреварот, создадоа голем број можности и не му дозволија на македонскиот тим ниту еднаш сериозно да го загрози голот на Грегор Кобел.
По натпреварот, Јакин изјави дека е задоволен од победата и од играта на својот тим, но жали што не биле реализирани повеќе од создадените шанси.
„Не постигнавме доволно голови против Македонија. Победивме сигурно и ја сочувавме нашата мрежа, но според шансите што ги создадовме, можевме да постигнеме и повеќе голови“, изјави швајцарскиот селектор.
Тој посочи дека неговите фудбалери во првото полувреме упатиле дури 17 удари кон противничкиот гол, но оцени дека премногу се потпирале на нападите по левата страна.
„Кога нападнавме од десната страна, двапати постигнавме гол. Тоа покажува дека требаше подобро да го користиме целиот простор на теренот“, истакна Јакин.
Според него, агресивната игра и освојувањето на таканаречените втори топки повторно биле најсилното оружје на Швајцарија.
„Брзото освојување на вторите топки ни донесе голема предност. Тоа е сегмент од играта што нè краси подолго време и повторно направи разлика на теренот“, додаде селекторот на Швајцарија.
