Скопје влегува во период на значајни инвестиции во јавниот превоз и сообраќајната инфраструктура. Владата најавува реализација на повеќе капитални проекти со кои треба да се подобри транспортот во главниот град, но и да се решат дел од долгогодишните проблеми со сообраќајниот метеж и недостигот на паркинг-простор.
Во рамки на обновувањето на автобускиот возен парк, предвидена е набавка на 150 електрични автобуси за целата држава, од кои 100 ќе бидат наменети за Скопје, а останатите 50 за другите градови. За нивното функционирање ќе бидат изградени и 75 станици за полнење.
Паралелно продолжуваат активностите за реализација на проектот за брз автобуски превоз (БРТ). За првата делница, која треба да ги поврзе Ѓорче Петров и Ново Лисиче, веќе е распишан тендер, а во следната фаза е планирана набавка на околу 40 нови еколошки автобуси.
Во плановите е вклучен и развојот на градскиот воз. Првата линија од Транспортниот центар до Зелениково веќе е реализирана, а следуваат уште две траси – кон Аеродром и Скопје-Север, како и кон Ѓорче Петров, со што железничката мрежа постепено ќе ги поврзе повеќето делови од градот.
Според најавите, крајната цел е создавање интегриран јавен превоз, во кој електричните автобуси, БРТ-системот и градскиот воз ќе функционираат како единствен транспортен систем. Планирано е БРТ да биде директно поврзан со градскиот воз кај Железничката станица, овозможувајќи им на патниците полесно и побрзо да го продолжат патувањето.
Освен јавниот превоз, Владата најавува и конкретни чекори за решавање на хроничниот недостиг од паркинг-простор кај Клиничкиот центар „Мајка Тереза“. Во тек е тендерска постапка за изградба на две монтажни паркинг-гаражи со вкупен капацитет од повеќе од 520 паркинг-места, а изградбата треба да започне по завршувањето на постапката.
Со реализацијата на овие проекти се очекува Скопје да добие помодерен, поефикасен и поеколошки систем на јавен превоз, како и подобри услови за движење и паркирање во градот.
