Републичката изборна комисија (РИК) на Србија вечерва ја потврди изборната листа на Партијата за демократска акција на Санџак (СДА) за учество на предвремените парламентарни избори кои ќе се одржат на 25 октомври.
Листата „СДА Санџак – Чувари на Санџак“, предводена од Ахмедин Шкријељ, ќе биде под реден број 11 на гласачкото ливче, согласно одлуката на изборната комисија.
Со оваа одлука, РИК досега има потврдено вкупно 11 изборни листи за учество на изборите. Крајниот рок за поднесување на кандидатски листи е 4 октомври на полноќ, односно 20 дена пред одржувањето на изборите. За учество, партиите и коалициите треба да достават најмалку 10.000 заверени потписи од граѓани, додека за листите на националните малцинства потребни се 5.000 потписи.
На прво место на гласачкото ливче ќе се најде листата „Александар Вучиќ – Единствена Србија“, поднесена од коалицијата предводена од Српската напредна партија (СНС). Носител на листата е српскиот претседател Александар Вучиќ, а меѓу кандидатите се и претседателот на СНС Милош Вучевиќ и претседателката на српскиот парламент Ана Брнабиќ.
Втора ќе биде листата „Ивица Дачиќ – фактор на стабилност“, поднесена од коалицијата на Социјалистичката партија на Србија (СПС), предводена од лидерот на социјалистите Ивица Дачиќ.
Под број 3 ќе се најде „Студентската листа – Студентите победуваат“, предводена од професорот на Медицинскиот факултет во Нови Сад, Илија Срдановиќ.
Четврта ќе биде листата „Расим Љајиќ – Народна СДП/ЦДП“, на коалицијата на Санџачката демократска партија (СДП) и Црногорската демократска партија (ЦДП), чиј носител е поранешниот српски министер Расим Љајиќ.
Под број 5 ќе биде листата на Сојузот на војводинските Унгарци, предводена од Балинт Пастор, додека шестото место ќе го има листата „Усаме Зукорлиќ – Движење за обединување“, на Партијата за правда и помирување (СПП).
На седмото место ќе биде „Руска партија – Србија во БРИКС – Слободан Николиќ“, а осма ќе биде листата на коалицијата составена од претставници на Новата демократска партија на Србија (НДСС) и партијата Монархисти – Движење за Кралството Србија.
Изборниот процес во Србија продолжува со потврдување на останатите пријавени листи, а конечниот список ќе биде познат по истекот на рокот за поднесување кандидатури.
