Судењето против 13 полициски службеници обвинети во врска со трагичниот пожар во дискотеката „Пулс“ во Кочани започна од почеток, поради промена во составот на Судечкиот совет.
Од Основниот суд информираа дека постапката морала повторно да стартува откако еден од поротниците, поради здравствени причини, известил дека повеќе од еден месец нема да може да присуствува на рочиштата, додека вториот поротник се повлекол поради други обврски.
Со предметот и понатаму претседава судијката Фанка Јанчулева Михаиловска, а обвинението го застапува јавната обвинителка Спасенка Андонова, која истакна дека Обвинителството во целост останува на поднесеното обвинение.
Сите 13 обвинети – Дејан Салтировски, Ванчо Георгиевски, Марија Маневска, Томе Донев, Драган Петрушев, Кире Богатинов, Стојанче Филипов, Благица Митева, Кристина Николова, Мазлум Рамаданов, Дарко Милошевски, Мартин Арсовски и Маријан Радевски – повторно се изјаснија пред Судот, наведувајќи дека остануваат на своите претходни искази и дека не се чувствуваат виновни.
Судот одлучи досега изведените материјални докази и исказите на веќе сослушаните сведоци да бидат преземени во новата постапка, по што судењето продолжува со изведување дополнителни докази и сослушување сведоци предложени од Обвинителството.
Предметот се однесува на пожарот што на 16 март избувна во дискотеката „Пулс“ во Кочани, трагедија во која загинаа 63 лица, а повеќе од 200 беа повредени.
Според обвинението, полициските службеници кои биле ангажирани во критичниот период не презеле мерки да ја прекинат забавата, ниту ја спречиле употребата на пиротехнички средства, иако истовремено биле присутни и извршувале службени задачи во дискотеката.
