Два големи изборни пресврти ја потресоа Германија – АфД според проекциите заврши прв во Мекленбург-Западна Померанија, а Левица стана најсилна партија во Берлин.
Според проекцијата на АРД од 19:57 часот, АфД во Мекленбург-Западна Померанија освои 37,9 проценти, а СПД на покраинската премиерка Мануела Швезиг беше веднаш зад него со 35,7 проценти.
ЦДУ на германскиот канцелар Фридрих Мерц падна на само пет проценти и се најде на самата граница за влез во покраинскиот парламент.
Доколку тој резултат се потврди, тоа би бил најлошиот резултат на ЦДУ на покраински избори од основањето на Сојузна Република Германија.
Голема промена се случи и во Берлин, каде Левица според проекциите победи со 25,3 проценти од гласовите. ЦДУ во германската престолнина беше на 19,1 проценти, АфД на 16,2, Зелените на 14,5, а СПД на 12,1 проценти.
За ЦДУ тоа е значителен пад и во Берлин, каде на повторените избори во 2023 година партијата имаше освоено 28,2 проценти.
Мерц излезе пред јавноста само неколку минути по првите проекции и јасно порача дека планира да остане и на чело на ЦДУ и на функцијата германски канцелар.
„Резултатот во Мекленбург-Западна Померанија не можеме да го разубавуваме, тоа е катастрофа“, призна Мерц.
Тој оцени дека ЦДУ била потисната во силно поларизираната изборна битка меѓу СПД и АфД, но најави продолжување на реформите.
Во АфД, пак, резултатот го претставија како доказ за силниот раст на партијата, а копретседателката Алис Вајдел изјави дека ја „истиснале ЦДУ“ од позицијата на водечка народна партија. АфД сепак нема мнозинство за самостојно формирање влада во Мекленбург-Западна Померанија, а другите партии досега ја отфрлаа можноста за коалиција со него.
Во Берлин победата на Левица отвора нова битка за составување на градската власт, при што нејзиниот ветеран Грегор Гизи резултатот го нарече историска пресвртница.
По резултатите од двете покраини, притисокот врз Мерц и раководството на ЦДУ дополнително се зголемува, а веќе во понеделник треба да заседава сојузното раководство на партијата.
