Иран поставил седум услови како предуслов за почеток на евентуални преговори со Соединетите Американски Држави, соопшти секретарот на иранскиот Врховен совет за национална безбедност, Мохсен Резаи. Иако целосната листа не е објавена, Техеран испрати јасна порака дека очекува Вашингтон да ги прифати неговите барања доколку сака да се отвори пат за дијалог.
Резаи преку социјалната мрежа Х порача дека САД нема да можат да излезат од сегашната криза без да ги признаат, како што наведе, правата и условите на Иран.
Тој претходно откри три од вкупно седумте барања. Според него, Иран бара прекин на воените дејствија на сите фронтови, ослободување на замрзнатите ирански средства и укинување на американската поморска блокада. Останатите четири услови засега не се јавно соопштени.
Според Резаи, Катар, кој има посредничка улога, веќе ги пренел иранските барања до американската администрација, а Техеран сега го очекува официјалниот одговор од претседателот Доналд Трамп.
Воедно, иранскиот функционер предупреди дека земјата е подготвена и за продолжување на конфликтот доколку дипломатските напори не вродат со плод.
Во меѓувреме, Катар и Пакистан продолжуваат со иницијативите за обновување на директните разговори меѓу Вашингтон и Техеран, во обид да се намалат тензиите и да се избегне натамошна ескалација.
