Саудиска Арабија побарала помош од регионални и глобални партнери за заштита на својот воздушен простор од ракетните и беспилотни напади на јеменските Хути, објави Асошиејтед прес повикувајќи се на регионални претставници. Според овие извори, Ријад побарал од Франција, Велика Британија, Пакистан и Египет да распоредат капацитети за противвоздушна одбрана.
Еден од претставниците оценил дека Саудиска Арабија се наоѓа во „многу тешка ситуација“, бидејќи истовремено мора да ги заштити воените бази, владините објекти и нафтената инфраструктура. АП наведува дека земјата се соочува со недостиг од ракетни пресретнувачи, додека и можностите на САД за испорака на дополнителни количества во моментов се ограничени.
Според агенцијата, американските резерви на пресретнувачи биле намалени за време на конфликтот со Иран, што дополнително ја ограничило можноста Вашингтон да му помогне на Ријад.
Хутите во меѓувреме ги засилија нападите врз стратешки цели во Саудиска Арабија, а неделава тврдеа и дека собориле саудиски борбен авион Ф-15. Минатата недела со беспилотни летала беше нападнат и стратешкиот саудиски нафтовод што ги поврзува источниот и западниот дел на земјата, по што рутата беше привремено затворена.
Додека Ријад настојува да обезбеди дополнителна меѓународна поддршка за својата воздушна одбрана, Оман и Египет, според АП, предводат дипломатски напори за деескалација на конфликтот.
