Министерот за правда Јетон Шасивари оствари средба со вицегувернерот на Банката за развој на Советот на Европа (ЦЕБ), Томаш Бочек, на која биле разгледани активностите поврзани со реализацијата на проектот „Реконструкција на казнено-поправните установи во Република Северна Македонија“.
Од Министерството за правда информираат дека проектот се реализира со заем од ЦЕБ во вредност од 46 милиони евра, а неговата цел е подобрување на условите во казнено-поправните установи и нивно усогласување со европските стандарди.
Со предвидените активности треба да се обезбедат современи услови за сместување, здравствена заштита, хигиена, како и простории и можности за работни и слободни активности на осудените и притворените лица.
Од ресорното министерство посочуваат дека проектот во текот на 2026 година продолжува да се реализира според утврдената динамика. Во јули годинава бил склучен договор за стручен надзор над изградбата, а во тек е и постапката за избор на изведувач за планираните градежни активности.
Министерството за правда нагласува дека останува посветено на реформите во системот за извршување на санкциите и создавање современи услови во казнено-поправните установи, согласно европските принципи и стандарди.
