Нови фотографии до кои дошол CBS News покажуваат тешки оштетувања на повеќе американски воени бази на Блискиот Исток по иранските ракетни и напади со беспилотни летала. Снимките, според медиумот, биле доставени од активни американски војници кои побарале да останат анонимни поради воените правила за комуникација со медиумите.
На една од фотографиите од базата „Принц Султан“ во Саудиска Арабија се гледа тешко оштетен авион „Боинг Е-3 Сентри“, чиј заден дел е целосно одвоен од трупот. Други снимки од истата база и од кампот „Бјуринг“ во Кувајт покажуваат изгорени згради и бараки, како и уништена воена инфраструктура.
Главниот инспектор на американското Министерство за одбрана во нов извештај наведува дека загубите на опрема достигнуваат до 3,7 милијарди долари и опфаќаат речиси 60 уништени или оштетени летала.
Според податоците на CENTCOM наведени во извештајот, Иран погодил американски бази во Кувајт, Бахреин, Катар, Обединетите Арапски Емирати, Саудиска Арабија, Ирак, Оман и Јордан. Еден од американските војници кој разговарал со CBS News тврди дека размерите на оштетувањата во базите не биле целосно претставени пред американската јавност.
Конгресната истражувачка служба во посебен извештај наведува дека американската војска од почетокот на војната со Иран загубила најмалку 42 летала. Меѓу загубите, според податоците презентирани пред Конгресот, се најмалку 24 напредни дронови „MQ-9 Reaper“, чија поединечна вредност се проценува на околу 30 милиони долари.
Вкупните трошоци за американската операција „Епски бес“ достигнале околу 29 милијарди долари, при што во таа сума не е вклучена штетата на погодените воени бази.
Финансискиот контролор на Пентагон, Џулс Херст, пред конгресмените потврдил дека значителен дел од средствата се трошат за итни поправки и замена на уништената воена техника.
Според објавените американски податоци, штетата на самите бази се мери во дополнителни милијарди долари, што укажува на значително поголеми материјални последици од иранските напади.
New photos obtained exclusively by CBS News reveal for the first time the widespread damage and destruction of buildings and vehicles at multiple U.S. positions across the Middle East, as a result of Iranian missile and drone attacks. The images were sent to CBS News by active… pic.twitter.com/MmOX1rQgwN
— CBS News (@CBSNews) September 16, 2026
