57-годишна скопјанка била ранета во рамото од заталкан куршум додека седела во дворот од својот семеен дом во населбата Драчево, соопшти Министерството за внатрешни работи.
Според информациите од МВР, случајот бил пријавен вчера вечер во СВР Скопје од Поликлиниката Драчево, каде жената била донесена со повреда.
„На 14 септември во 21:45 часот во СВР Скопје, од Поликлиника Драчево е пријавено дека кај нив со повреда била донесена Ј.С. (57) од Скопје. Според пријавеното, околу 20:40 часот, додека била во дворот од семејниот дом, почувствувала удар во рамото, а по извршениот преглед било констатирано дека повредата настанала од заталкано зрно од оружје“, информираат од МВР.
Жената веднаш била пренесена на лекарски преглед, при што било утврдено дека станува збор за повреда предизвикана од куршум.
Од полицијата велат дека се преземаат мерки за целосно расчистување на случајот и утврдување на околностите под кои дошло до инцидентот.
