Српскиот претседател Александар Вучиќ најави дека на 27 септември ќе поднесе оставка од функцијата и потоа ќе ја започне кампањата за парламентарните избори закажани за 25 октомври. Тој ја предводи листата „Обединета Србија“, формирана околу Српската напредна странка, и најави дека во изборната кампања ќе настапува како обичен граѓанин.
Во пресрет на изборите, „Студентска листа – Студентите победуваат“ ги претстави сите 250 кандидати за пратеници во српскиот парламент. Листата ја предводи кардиологот и професор на Медицинскиот факултет во Нови Сад, Илија Срдановиќ.
Меѓу кандидатите има професори, лекари, уметници, активисти, спортисти и други јавни личности од различни делови на Србија, меѓу кои и поранешниот кошаркарски репрезентативец Дејан Бодирога.
Студентите наведуваат дека кандидатите биле избрани преку процес на одлучување што повеќе од една година го граделе преку блокади, пленуми, дискусии и заедничка работа.
Вучиќ најави кампања низ Србија и неколку големи митинзи, а изрази и подготвеност за телевизиска дебата со носителот на студентската листа. Со оставката на Вучиќ и влегувањето на студентското движење во изборната трка, Србија влегува во интензивна кампања пред гласањето на 25 октомври.
