Беким Сејдиу се повлече од кандидатурата за претседател на Косово поради недостаток на потребната поддршка во парламентот.
Тој за одлуката ги известил Движењето Самоопределување и Демократската лига на Косово, кои го предложија како заеднички кандидат.
Двете партии на 31 август постигнаа договор за неговата кандидатура, но веќе следниот ден шест пратеници на ЛДК најавија дека нема да го поддржат. Сејдиу оцени дека претседателскиот избор се претворил во дел од внатрешнополитичките конфликти и дека неговото повлекување треба да помогне во надминување на кризата.
Тој порача дека на Косово му се потребни институционална стабилност, политичка зрелост и единство, наместо нови поделби и политички драми.
Повлекувањето доаѓа непосредно по конституирањето на Собранието и изборот на новата влада предводена од Албин Курти.
Опозициската Демократска партија на Косово го оспори процесот и побара од Уставниот суд привремена мерка против Собранието, тврдејќи дека биле прекршени уставните рокови и процедури.
Сејдиу ги повика политичките партии да најдат излез од институционалната неизвесност и да ја вратат довербата на граѓаните во политичкиот систем.
