Јехуда Ахарон Видавски, познат како најстар преживеан од Холокаустот, почина во Израел на 107-годишна возраст, соопштија израелските медиуми и Меморијалниот центар „Аушвиц-Биркенау“.
Видавски бил роден во Полска во 1919 година, а починал во неделата. Тој бил еден од преживеаните нацистичкиот концентрационен логор Аушвиц, каде ги поминал едни од најтешките периоди во својот живот.
За време на Холокаустот, голем дел од неговото семејство било убиено од нацистичкиот режим. По војната, Видавски во 1950 година емигрирал во Израел, каде го продолжил својот живот и станал активен чувар на сеќавањето на жртвите на Холокаустот.
Од 1978 година учествувал во обновувањето на еврејските гробишта во Полска, а помогнал и во идентификацијата и обележувањето на повеќе од 3.000 гробови, информираа од Меморијалниот центар „Аушвиц-Биркенау“.
Израелскиот претседател Исак Херцог изрази сочувство до семејството на Видавски, нагласувајќи дека неговиот живот претставува сведоштво за силата на преживувањето, сеќавањето и обновувањето.
„Животот на Видавски беше извонредно сведоштво за победата на животот, сеќавањето и обновувањето“, порача Херцог.
Според податоците на израелските институции, во земјата сè уште живеат околу 109.000 преживеани од Холокаустот.
За време на Холокаустот во Европа, нацистичкиот режим и неговите сојузници убиле приближно шест милиони Евреи.
