Од ВМРО-ДПМНЕ реагираат на обвинувањата од СДСМ поврзани со трошоците за одбележувањето на 35 години независност на Македонија, оценувајќи дека опозициската партија создала „измислена афера“ без основа.
Од владејачката партија велат дека по објавувањето на информациите за проектот станало јасно дека немало незаконитости и дека сите детали се јавно достапни.
„Венко Филипче и СДС со денови ја лажеа јавноста, создаваа афери таму каде што ги нема и организираа хајка против луѓе и уметници. Сега, кога фактите ја разобличија нивната приказна, најмалку што можат да направат е јавно да се извинат“, се наведува во соопштението на ВМРО-ДПМНЕ.
Од партијата обвинуваат дека на СДСМ им пречи секое одбележување на национални датуми и настани кои, како што велат, создаваат чувство на гордост и припадност кај граѓаните.
„Им пречи кога Македонија слави сопствени успеси и сопствена историја“, наведуваат од ВМРО-ДПМНЕ, оценувајќи дека политиката на СДСМ се темели на омаловажување на националните достигнувања.
Во реакцијата се упатуваат и критики кон лидерот на СДСМ, Венко Филипче, при што од партијата го обвинуваат за двојни стандарди и политички пресметки.
Од ВМРО-ДПМНЕ додаваат дека јавноста, според нив, ги препознала фактите и дека обвинувањата за прославата биле неосновани.
„Фактите победија, лагите паднаа“, се наведува во соопштението на Центарот за комуникации на ВМРО-ДПМНЕ.
