Премиерот Христијан Мицкоски изјави дека во изминатите 24 до 25 месеци, откако актуелната Влада ја презеде функцијата, во земјава се реализирани околу 1,4 милијарди евра странски инвестиции.
Одговарајќи на новинарско прашање во Прилеп, Мицкоски направи споредба со резултатите на претходната влада, оценувајќи дека разликата е значителна.
„Во овие две години вкупното ниво на странски инвестиции изнесува околу една милијарда и 400 милиони евра. Ако ги споредиме првите две години од оваа Влада со првите две години од претходната, кога немаше кризи, тогаш станува збор за околу 1,4 милијарди евра наспроти околу 750 милиони евра. Бројките се јасни и разликата е огромна“, изјави премиерот.
Тој нагласи дека Владата останува целосно посветена на привлекување нови странски и домашни инвестиции, посочувајќи дека процесот ќе продолжи и во наредниот период.
Како пример ги наведе неодамнешните инвестициски проекти, меѓу кои и изградбата на голем ветерен парк во општините Радовиш, Штип и Карбинци, чија почетна вредност изнесува околу половина милијарда долари, со најави за дополнително проширување на инвестицијата.
Мицкоски говореше и на отворањето на новиот производствен погон на компанијата „ВИК“ (WIK) во Технолошко-индустриската развојна зона во Прилеп, оценувајќи дека ваквите проекти се потврда за довербата на инвеститорите во македонската економија.
Според него, економската политика на Владата ќе остане насочена кон создавање поволна деловна клима, отворање нови работни места и поттикнување на економскиот раст преку нови инвестиции.
