Премиерот Христијан Мицкоски повторно се осврна на својата изјава за „талогот“ и „елитата“, откако СДСМ реагираше на неговите зборови, посочувајќи дека опозициската партија сама се препознала во пораката.
„Жалам што СДСМ се препознава во талогот, но јас многу јасно кажав дека талогот не смее да ја победи елитата. Ако талогот ја победи елитата и стане елита, тогаш вистинската елита ќе ја напушти државата, а тоа не е добро“, изјави Мицкоски.
Тој нагласи дека од СДСМ, според него, постојано слуша навреди, обвинувања и невистини, но никогаш не се пожалил поради таквиот политички однос.
„Без исклучок, сè е лага. Ниту еднаш не сум излегол пред јавноста да плачам, да се жалам или да барам сожалување од граѓаните“, рече премиерот.
Мицкоски истакна дека јавните функционери мора да бидат подготвени да се соочат и со, како што рече, лажни и клеветнички кампањи, но наместо да се фокусираат на нив, треба да работат и да испорачуваат резултати.
„Ние сме јавни личности и наша обврска е да ги засукаме ракавите и да го испорачаме она што им е потребно на граѓаните. Тие нека останат во нивното политичко мочуриште, а ние ќе продолжиме да работиме и да испорачуваме резултати“, порача Мицкоски.
