Пушењето може сериозно да влијае врз репродуктивното здравје кај мажите и жените, предупредува Светската здравствена организација (СЗО), повикувајќи се на анализа на бројни научни студии спроведени ширум светот во периодот од 2000 до 2026 година.
Според СЗО, мажите кои пушат имаат поголема веројатност да се соочат со еректилна дисфункција, во споредба со непушачите. Кај нив се зголемува и ризикот од проблеми поврзани со ејакулацијата, како и нарушувања поврзани со квалитетот на сперматозоидите – нивниот број, подвижност и форма.
Кај жените, пушењето е поврзано со значително поголем ризик од проблеми со плодноста. СЗО наведува дека жените кои пушат имаат околу 40 проценти поголем ризик од неплодност во споредба со непушачите. Прекинувањето на пушењето може да помогне во намалување на овој ризик.
Поголемиот дел од достапните истражувања се однесуваат на класичните цигари, додека за поновите производи, како електронските цигари, сè уште нема доволно долгорочни податоци за целосно да се процени нивното влијание врз плодноста.
Од СЗО посочуваат и дека пушачите имаат помали шанси за успех при одредени третмани за асистирана репродукција, а негативно влијание може да има и изложеноста на пасивно пушење.
Според организацијата, околу едно од шест лица во репродуктивна возраст ќе се соочи со неплодност во одреден период од животот. Неплодноста се дефинира како неможност за постигнување бременост и покрај редовни и незаштитени сексуални односи во период од најмалку 12 месеци.
