Државниот врв и политичките партии упатија честитки по повод 8 Септември – Денот на независноста, потсетувајќи на историската одлука на граѓаните пред 35 години. Во пораките доминираат повиците за заедништво, зачувување на државноста, подобар живот, еднаквост и продолжување на европскиот пат.
„Пред 35 години го доживеавме нашиот трет Илинден, кога вековниот сон за слободна и независна македонска држава стана реалност“, порача претседателката Гордана Сиљановска-Давкова. Таа истакна дека со референдумот од 8 септември 1991 година граѓаните го заокружиле делото на илинденците и асномците, создавајќи национален и заеднички граѓански дом без оглед на етничката и верската припадност. Според Сиљановска-Давкова, денешната генерација има обврска да ги искорени криминалот и корупцијата, да обезбеди владеење на правото и да изгради праведно општество на рамноправни граѓани. Нејзината визија е стабилна и напредна европска Македонија во која младите нема да заминуваат, туку ќе создаваат семејства и ќе ја градат својата иднина.
„Среќен роденден, независна и самостојна Македонијо!“, порача премиерот Христијан Мицкоски во честитката по повод 35-годишнината од независноста. Празникот го честиташе со видео посветено на природните, културните и историските убавини на Македонија. Во видеото се прикажани Скопје и Вардар, Охрид, Струга, Канео, Плаошник, Крушево и „Македониумот“, Самуиловата тврдина, Козјак и други препознатливи места низ земјата. Со објавата Мицкоски симболично ги поврза независноста и државноста со природното, историското и културното наследство на Македонија.
„Пред 35 години граѓаните ги обедини сонот и стремежот за слободна и независна Македонија“, порачаа од ВМРО-ДПМНЕ. Од партијата нагласуваат дека независноста значи припадност, љубов кон татковината, но и одговорност да се зачува она што го оставиле претходните генерации. Македонскиот јазик, песна, традиција и знаме, според ВМРО-ДПМНЕ, се симболи во кои се вткаени историјата, корените и надежите за иднината. Од партијата посакуваат Македонија да стане земја во која младите ќе остануваат затоа што тука ќе можат да ги остварат своите соништа, а семејствата ќе веруваат во подобро утре. „Да ја чуваме Македонија со љубов, да ја градиме со дела и да ја оставиме посилна на оние што доаѓаат по нас“, се наведува во честитката.
„Македонската државност не започнува во 1991 година, туку е создавана низ генерации – од идеалите на Илинден, преку одлуките на АСНОМ до референдумот за независност“, порача лидерот на СДСМ, Венко Филипче. Тој оцени дека генерацијата од 1991 година ја избрала независноста и мирот во време на војни, по што следувала битката за меѓународно признавање, членството во НАТО и отворањето на европскиот пат. Според Филипче, денешната генерација има обврска да создаде држава во која младите ќе сакаат да останат, работниците достоинствено ќе живеат од својот труд, а повозрасните ќе имаат сигурна старост. Тој повика на изградба на економски силна и европска Македонија, со функционални институции, еднаква правда и европски можности за младите дома. Филипче порача дека генерациската задача е продолжување на македонската државотворна линија со заедништво, достоинство и јасна визија за иднината во Европа.
„Триесет и пет години независност се потврда на волјата на граѓаните да живеат во слободна, демократска и суверена држава“, порачаа од „Вреди“, нагласувајќи дека празникот им припаѓа на сите без разлика на етничката припадност, јазикот, верата или политичкото убедување. Од коалицијата посочуваат дека Албанците се нераскинлив дел од историјата, државноста и развојот на земјата и дека иднината треба да се гради врз еднаквост, правда и владеење на правото. За „Вреди“, европскиот пат нема алтернатива, бидејќи членството во Европската Унија треба да донесе повисоки стандарди, посилни институции и повеќе можности за граѓаните.
„Триесет и петтата годишнина од независноста е можност да се потсетиме на изминатиот пат, но и да размислиме каква држава ќе им оставиме на идните генерации“, порача лидерот на ДУИ, Али Ахмети. Тој оцени дека Охридскиот рамковен договор ја трансформирал државата кон поголема еднаквост, инклузивност и заедничка одговорност, создавајќи основа за нејзиниот пат кон НАТО и Европската Унија. Ахмети повика да се зачува постигнатото, да не се дозволи враќање кон политики што разделуваат и европската иднина да се гради преку поголема доверба и меѓусебно почитување меѓу сите граѓани.
