Модернизираниот аеродром „Св. Апостол Павле“ во Охрид денеска официјално е пуштен во употреба по реконструкцијата вредна 2,7 милиони евра. Со инвестицијата на ТАВ Македонија е реконструиран патничкиот терминал, чек-ин просторот е проширен за дополнителни 100 квадратни метри, а бројот на шалтери е зголемен од шест на осум.
Проширени се и зоните за безбедносна и пасошка контрола, просторот кај гејтовите и делот за подигање багаж, а воведени се нова опрема и технологија за побезбедно и поефикасно опслужување на патниците.
Административната зграда е проширена од 290 на 746 квадратни метри, со нови простории за ТАВ Македонија, Граничната полиција и Царината, како и ресторан и паркинг за вработените.
На свеченото пуштање во употреба присуствуваа премиерот Христијан Мицкоски, вицепремиерот и министер за транспорт Александар Николоски и извршниот директор на ТАВ Аеродроми, Серкан Каптан.
Министерот Николоски оцени дека со реконструкцијата Охрид добива практично нов аеродром, со значително подобри услови и поквалитетно искуство за патниците. Тој посочи дека последните поголеми интервенции на аеродромот биле направени пред повеќе од пет децении, а дополнителен импулс за неговиот развој треба да даде и автопатот Охрид-Кичево.
Според Николоски, само во првите шест месеци од годинава преку Охридскиот аеродром поминале повеќе од 240.000 патници, додека двата македонски аеродрома годинава се очекува да се приближат до четири милиони патници.
Обновениот терминал доби и препознатливи охридски културни обележја, меѓу кои реплики на мозаици од Варош и Плаошник и на фрески од катедралната црква „Света Софија“.
Николоски рече дека на тој начин аеродромот станува и своевиден мал музеј кој пред патниците го претставува културното богатство на Охридскиот регион.
Премиерот Мицкоски оцени дека Охридскиот аеродром со модернизацијата добива поинакво светло и изрази уверување дека во иднина континуирано ќе растат и бројот на патници и бројот на авиокомпании што ќе ги користат неговите услуги.
Тој порача дека аеродромот „Св. Апостол Павле“ претставува значајна алка за развојот на Охрид и на целиот регион.
