ВМРО-ДПМНЕ реагираше на критиките на СДСМ за случајот со приведениот вработен осомничен за обид за примање мито, оценувајќи дека институциите постапиле веднаш. Од партијата наведуваат дека осомничениот се обидел да земе мито, по што МВР спровело акција со обележани пари и против него била поведена постапка.
Според ВМРО-ДПМНЕ, токму овој случај покажува дека законите важат за сите и дека незаконското постапување се санкционира.
Владејачката партија го обвинува СДСМ дека со своите реакции се обидува случајот да го претстави како доказ против институциите, наместо како пример за нивно функционирање.
Од ВМРО-ДПМНЕ упатија и остри обвинувања кон лидерот на СДСМ, Венко Филипче, тврдејќи дека неговата партија „го брани криминалот“ и го саботира работењето на институциите. Од партијата порачуваат дека Владата ќе продолжи со борбата против криминалот и дека секој за кого ќе биде утврдено дека постапувал незаконски треба да одговара.
