Основното училиште „Братство“ во населбата Тафталиџе 2 ќе добие нова современа спортска сала, чија изградба официјално започна со поставување камен-темелник. На настанот присуствуваа премиерот Христијан Мицкоски, министерката за образование и наука Весна Јаневска и претставници на Општина Карпош, кои извршија увид и во градежните работи за реконструкција на улицата „Софиска“.
Новата спортска сала ќе се простира на површина од 1.400 квадратни метри и ќе располага со трибини со капацитет за 410 посетители. Освен за потребите на наставата по физичко образование, објектот ќе ги исполнува условите за организирање домашни и меѓународни спортски натпревари, како и спортско-културни манифестации.
Според најавите, изградбата на салата треба да биде завршена во рок од три месеци.
Премиерот Мицкоски истакна дека двата проекта – изградбата на спортската сала и реконструкцијата на улицата „Софиска“ – ќе придонесат за подобри услови за живот на жителите и учениците.
„Кога ќе биде изградена салата, учениците ќе имаат подобри услови за спортување, дружење и развивање на спортскиот дух, што ќе придонесе за нивниот правилен развој“, изјави Мицкоски.
Министерката Весна Јаневска нагласи дека салата ќе биде мултифункционален објект, кој покрај училиштето ќе може да се користи и за спортски натпревари, културни настани и други јавни активности.
Таа информираше дека Владата во моментов реализира околу 70 проекти во образованието, чија вкупна вредност изнесува речиси 90 милиони евра.
„Заедно со општините спроведуваме голема градежна офанзива за подобрување на образовната инфраструктура и создавање подобри услови за учениците низ целата држава“, порача Јаневска.
