До пред 7-8 години Македонија се мачеше со решавање на проблемот со невработеноста, па така од релевантните државни органи постојано се објавуваа проценти на стапката на невработеност која во годините наназад неретко преминуваше и над 25 отсто. Денеска ситуацијата е различна, Македонија се мачи како да пополни слободни работни места.
Рекордни 10.697 слободни работни места биле регистрирани во Македонија во вториот квартал од годинава, од април до јуни, покажуваат податоците на Државниот завод за статистика. Најголема побарувачка имало за работници во услужните дејности и продажбата, каде што биле слободни 2.980 работни места. Највисока стапка на слободни позиции од 6,23 проценти е регистрирана во секторот за сместување и послужување храна.
Истовремено, податоците на Агенцијата за вработување покажуваат дека во јуни 88.541 лице активно барале работа. Од нив, 60,9 проценти се без образование или имаат само основно образование, додека 31,8 проценти имаат завршено средно образование.
Овие бројки укажуваат на сериозен расчекор на пазарот на труд – компаниите бараат работници, но голем дел од невработените не одговараат на потребниот образовен и професионален профил. Според анкетата на Агенцијата меѓу работодавачите, приватниот сектор очекува отворање на уште 14.498 работни места, од кои најмногу, 5.328, во преработувачката индустрија.
