Превозниците организирани во транспортната асоцијација „Макам-транс“ денеска од 12 до 14 часот ќе одржат предупредувачки протест пред Делегацијата на Европската Унија во Скопје, барајќи конечно решение за проблемот со ограничениот престој на професионалните возачи во Шенген-зоната.
Протестот се организира во пресрет на утрешниот состанок на Работната група во Брисел, од кој домашните транспортери очекуваат конкретен напредок во решавањето на примената на правилото „90/180“. Според ова правило, државјаните на земји кои не се членки на Европската Унија можат да престојуваат најмногу 90 дена во период од 180 дена во Шенген-зоната.
Пред Делегацијата на ЕУ ќе бидат паркирани околу дваесет товарни возила, а на протестот ќе присуствуваат сопственици на транспортни компании, професионални возачи и вработени од повеќе градови низ државата. Во исто време, најавени се слични протести и во Србија, Босна и Херцеговина и Црна Гора.
Генералниот секретар на „Макам-транс“, Биљана Муратовска, изјави дека протестот претставува предупредување до Европската Унија, бидејќи и по седум месеци сè уште нема конкретно решение за проблемот.
„По седум месеци проблемот со престојот останува нерешен. Септември е период кога започнува најголемиот обем на работа, па сакаме да испратиме јасна порака дека е неопходно конечно решение. Очекуваме прашањето да биде ставено на дневен ред на состанокот на земјите од Шенген-зоната“, изјави Муратовска.
Во врска со активностите на Министерството за транспорт, кое најави склучување билатерални договори со земјите од Шенген-зоната, Муратовска посочи дека досега единствено Хрватска презела конкретни законски измени, додека од останатите држави нема официјални потврди за слични чекори.
Вицепремиерот и министер за транспорт Александар Николоски неодамна соопшти дека Владата интензивно работи на билатерални договори со земјите членки на Шенген-зоната за да им помогне на македонските транспортери.
Тој нагласи дека веќе постојат договори со Швајцарија, Хрватска и Романија, додека во септември и октомври се планирани разговори со Австрија и Словенија, а паралелно се работи и на договор со Германија.
Доколку на утрешниот состанок во Брисел не биде понудено преодно решение, превозниците најавуваат можност на 14 септември да организираат координирани протести на граничните премини во повеќе земји од регионот.
Според „Макам-транс“, проблемот директно засега околу 17.000 професионални возачи од Македонија, додека на ниво на Западен Балкан со истиот проблем се соочуваат околу 100.000 возачи.
Од асоцијацијата предупредуваат дека дел од возачите веќе одбиваат да возат поради неизвесноста на граничните премини, каде правилото „90/180“ различно се толкува од граничните служби, што доведува до економски загуби и случаи на депортација.
