Иранскиот врховен лидер, ајатолах Моџтаба Хамнеи, ги повика земјите од Заливот да го идентификуваат својот „вистински непријател“, да ги разберат неговите планови и заеднички да му се спротивстават. Во писмената порака по повод празникот на раѓањето на пророкот Мухамед, Хамнеи повика на единство, меѓусебна одбрана и поголема соработка меѓу муслиманите во светот.
Инаку, Хамнеи не е виден во јавноста откако пред шест месеци беше ранет во американско-израелските воздушни напади во кои загина неговиот татко и тогашен врховен лидер на Иран, ајатолах Али Хамнеи.
Во меѓувреме, Меѓународната поморска организација на Обединетите нации соопшти дека околу 6.000 морнари на приближно 400 бродови се блокирани во Арапскиот Залив поради неможноста да поминат низ Ормускиот Теснец. Причина за блокадата се продолжените тензии меѓу Иран и Соединетите Американски Држави, кои сериозно го нарушија поморскиот сообраќај низ една од најважните светски рути за транспорт на енергенси.
Иранската влада најавува дека ќе продолжи цврсто да се спротивставува на американските санкции и на она што го нарекува американско-израелски „заговори“. Иранскиот претседател Масуд Пезешкијан соопшти дека Техеран постигнал договор со Оман за воспоставување рута за бродовите што треба да минуваат низ Ормускиот Теснец. Според Пезешкијан, врховниот лидер Хамнеи е информиран за деталите од договорот, кој треба да помогне во повторното воспоставување на поморскиот сообраќај низ теснецот.
