Повеќе лица се погодени во пукање што се случило рано утринава на рејв забава во швајцарскиот град Арау, соопшти кантоналната полиција во Аргау. Инцидентот се случил нешто пред 3 часот наутро на хиподромот каде што се одржувала традиционалната техно-забава „Aarauer Rave“. Полицијата потврди дека биле испукани повеќе куршуми, но засега не го објавува точниот број на загинати или повредени. Според организаторите, на забавата присуствувале околу 3.500 луѓе.
Во тек е голема потрага по напаѓачот, а засега не е познато дали станува збор за едно или за повеќе лица. Во безбедносната операција се вклучени голем број полицајци, како и воениот хеликоптер „Супер Пума“. Поради истрагата, властите го затворија и блиското градско капалиште и апелираа граѓаните да го избегнуваат целиот реон. Полицијата ги повика посетителите да достават фотографии и видеоснимки што би можеле да помогнат во расветлувањето на околностите на нападот.
