Украински беспилотни летала во текот на ноќта нападнале повеќе локации во Ростовската област на југот на Русија, меѓу кои и логистички објект на „Озон“ во Ростов на Дон. Од компанијата соопштија дека по ударот избувнал помал пожар кој брзо бил изгаснат, а работата на објектот привремено била прекината поради безбедносна проверка.
Според руски и локални извори, пожар избувнал и во магацин на компанијата за електроника и апарати за домаќинство „ДНС“ во Аксај, од каде вработените биле евакуирани. Гувернерот на Ростовската област Јуриј Сљусар соопшти дека остатоци од дрон биле пронајдени во подрачјето на еден магацин во округот Аксај, но не прецизираше за кој објект станува збор.
Локални канали објавија дека погоден бил и магацин на рускиот синџир супермаркети „Чижик“ во селото Ленинское, додека Сљусар потврди дека под напад биле Ростов на Дон и окрузите Аксај, Багаев и Неклиновски. Според рускиот гувернер, во нападите се повредени седум лица, а две возрасни лица и две деца биле хоспитализирани во Ростов на Дон.
Остатоци од дрон оштетиле и две станбени згради во Пролетарскиот округ, поради што дел од жителите биле евакуирани. Украинските сили во последниот период ги интензивираа нападите со беспилотни летала врз цели длабоко на руска територија, вклучително и нафтени, логистички и други инфраструктурни објекти.
Во текот на ноќта украински дронови ја погодиле и рафинеријата во Јарослав, еден од поголемите руски капацитети за преработка на нафта, според украинскиот Генералштаб. Во текот на летото беа пријавени и повеќе напади врз магацини на големите руски интернет-трговци „Озон“ и „Вајлдберис“, при што Украина ги поврзува ваквите операции со обидите да се намали способноста на Русија да ја продолжи војната.
