СДСМ соопшти дека во целост ги поддржува барањата на националните телевизии и јавниот сервис за институционална проверка на влегувањето на српски медиумски компании на македонскиот пазар. Портпаролката на партијата Богданка Кузеска изјави дека мора да се испита дали при влегувањето на „Еуроњуз Македонија“ и групацијата „Ало“ се заобиколуваат македонските закони. Таа се повика на предупредувањата од националните телевизии и Македонската медиумска асоцијација, кои, според неа, тврдат дека располагаат со материјални докази за канали што подолг период работеле без домашна дозвола.
Кузеска го обвини премиерот Христијан Мицкоски дека во Македонија применува модел на медиумско и политичко влијание сличен на оној на српскиот претседател Александар Вучиќ. Од СДСМ тврдат дека станува збор за поширока инфраструктура за политичко, економско и медиумско влијание поврзано со концептот на „српски свет“. Кузеска го поврза овој процес и со влегувањето на АЛТА банка во македонскиот банкарски сектор, тврдејќи дека во банката се префрлаат средства од јавни претпријатија и државни институции.
Таа дополнително изнесе обвинувања дека целта е воспоставување контрола врз информациите што стигнуваат до граѓаните и намалување на критиката кон власта. СДСМ бара надлежните институции целосно да ги истражат сомнежите околу работењето и влегувањето на српските медиумски компании и да утврдат дали има прекршување на законите и одговорност.
