Директорот на ЦИА, Џон Ретклиф, за време на посетата на Москва ја предупредил Русија да не презема напади врз земјите членки на НАТО, објавуваат „Волстрит журнал“ и „Политико“, повикувајќи се на неименувани извори. Според „Политико“, Ретклиф посебно предупредил на можноста од ескалација на војната во Украина која би можела да ги вклучи источните сојузници на НАТО во балтичкиот регион.
Американскиот разузнавачки шеф, наводно, побарал од Кремљ да ја намали и воената и финансиската поддршка за Иран.
Портпаролот на Кремљ, Дмитриј Песков, потврди дека Ретклиф престојувал во Москва на разговори меѓу безбедносните служби, но нагласи дека немал средба со рускиот претседател Владимир Путин. Ова најверојатно е прва посета на Ретклиф на Москва откако ја презеде функцијата директор на ЦИА, а деталите од разговорите официјално не се објавени.
Последната позната посета на директор на ЦИА на Русија беше во 2021 година, кога Вилијам Барнс беше испратен во Москва од тогашниот американски претседател Џо Бајден во обид да спречи ескалација на конфликтот околу Украина.
