Колумбиската влада разгледува необичен план еден брод на морнарицата да биде претворен во строго чуван затвор за водачите на најопасните криминални организации. Проектот предвидува криминалните босови да бидат целосно изолирани за да не можат од затвор да организираат изнуди, закани и други криминални активности.
На проектот, наречен „Стратегија за специјален поморски затвор со висока безбедност“, работат министерствата за одбрана и правда и Националниот институт за затвори и казнено-поправни установи. Планот сè уште е во фаза на подготовка и бродот-затвор не е ставен во употреба.
Колумбија, сепак, има искуство со ваков начин на изолација на криминални босови уште од 2007 година. Тогаш Карлос Марио Хименез Наранхо, познат како „Макако“, бил привремено затворен на фрегата во Карипското Море, додека наркобосот Диего Леон Монтоја Санчез, познат како „Дон Диего“, бил чуван на воен брод во Тихиот Океан. Целта и тогаш била да се спречи двајцата од затвор да продолжат да управуваат со своите криминални организации.
Паралелно со проектот за брод-затвор, претседателот Абелардо Де Ла Есприела најавува и изградба на десет строго чувани мегазатвори за најопасните криминалци и терористи во земјата. Тој оцени дека колумбиските затвори се претвориле во центри од кои се организираат изнуди, закани и убиства и побара од затворската управа повторно да воспостави целосна контрола врз нив.
