Единицата за брзо распоредување синоќа во Битола одбележа 25 години од формирањето, со свеченост пред Офицерскиот дом посветена на четврт век служба во функција на безбедноста на граѓаните и државата. Министерот за внатрешни работи Панче Тошковски оцени дека ЕБР денес е еден од најважните оперативни сегменти на македонската полиција и еден од столбовите на безбедносниот систем. Тој нагласи дека припадниците на единицата се ангажираат во најсложените полициски операции, при нарушувања на јавниот ред и мир од поголем обем и во ситуации кои бараат брза и организирана реакција.
Тошковски посочи дека современите безбедносни ризици и сè пософистицираниот организиран криминал бараат подобра координација, модерна технологија, специјализирана опрема и врвно обучен кадар. Според него, целта е изградба на модерна, професионална, добро опремена и мотивирана македонска полиција способна да одговори на новите безбедносни предизвици.
Командантот на ЕБР, Стојанче Николов порача дека во изминатите 25 години се менувале генерациите, опремата, тактиките и условите за работа, но непроменета останала посветеноста на припадниците на единицата. Тој истакна дека ЕБР низ годините прераснала во една од најподготвените и најангажираните оперативни единици во рамките на македонската полиција. Николов нагласи дека единицата ја создавале сите генерации кои во изминатиот четврт век поминале низ нејзините редови и дека обврската е таа во иднина да биде уште попрофесионална и посилна.
Во рамките на свеченоста беше изведена тактичко-показна вежба на која припадниците ги демонстрираа своите способности и оперативната подготвеност, а беше изложена и специјализираната опрема на ЕБР. За најдобар припадник во изминатата година беше прогласен Драган Атанасов, кој доби благодарница за постигнатите резултати. Плакети за придонес во поддршката и унапредувањето на проектите на единицата добија повеќе претставници на МВР и БЈБ, како и градоначалникот на Битола Тони Коњановски. Вкупно 33 припадници добија плакети по повод 25 години служба во Единицата за брзо распоредување.
