ВМРО-ДПМНЕ го обвини Обвинителството дека предметот за модуларните болници со години бил држен во фиока, а сега завршува без утврдена одговорност за поранешниот министер за здравство Венко Филипче. Од партијата потсетуваат дека предметот бил оформен на 10 септември 2021 година, два дена по пожарот во модуларната болница во Тетово во кој загинаа 14 лица.
Според ВМРО-ДПМНЕ, одговорноста на Филипче треба да се разгледува и преку начинот на кој биле регулирани и поставувани модуларните болници, кои со законски измени биле категоризирани како „урбана опрема“. Партијата тврди дека објектите не биле запишани во катастар, немале владина одлука за трајно користење и немале одобрение за употреба согласно со соодветниот правилник.
Од ВМРО-ДПМНЕ наведуваат дека документација за овие околности во декември 2023 година била доставена до Обвинителството за организиран криминал и корупција. Партијата упати остри обвинувања и кон обвинителот Ислам Абази, тврдејќи дека одлуката покажува влијание на СДСМ и ДУИ врз Обвинителството.
