Една од мерките предвидени во изборната програма на Општина Гази Баба веќе е реализирана, а со неа младите до 35 години се ослободуваат од плаќање комуналии за изградба на својот прв дом, информира градоначалникот Бобан Стефковски.
Стефковски посочува дека мерката првично била наменета за лица до 29 години, но по направена анализа на потребите на младите, старосната граница била зголемена на 35 години. Со тоа, како што наведува, можноста ја добиваат поголем број млади лица и семејства кои сакаат да изградат сопствен дом во Општина Гази Баба.
Правото на ослободување од плаќање комуналии можат да го остварат лицата кои на денот на поднесување на барањето немаат наполнето повеќе од 35 години и се жители на Општина Гази Баба.
Услов е да станува збор за изградба, доградба или надградба на прв дом во сопственост на подносителот, кој ќе се користи исклучиво за лични станбени потреби. За остварување на правото потребно е да биде доставена комплетна техничка документација согласно Законот за градење, како и изјава дека објектот ќе биде користен за сопствено домување во период од најмалку 10 години.
Од Општината велат дека со оваа мерка се создаваат дополнителни услови младите да останат во својата локална заедница и полесно да дојдат до сопствено станбено решение.
„Со оваа мерка ги стимулираме младите да останат тука, во нашата општина, да создадат свој дом, своја иднина и своја приказна – токму во Гази Баба“, истакнува Стефковски.
Тој упатува и повик до младите брачни парови да ја искористат можноста и да направат чекор кон создавање сопствен дом и иднина во општината.
„Ги повикувам сите млади брачни парови да ја искористат оваа можност и да го направат својот следен чекор кон својот дом, своето семејство и својата иднина“, вели Стефковски.
