Синоќешниот музичко-сценски спектакл во Охрид, организиран по повод 35 години од независноста на Македонија, стана повод за нова политичка пресметка меѓу СДСМ и ВМРО-ДПМНЕ. Опозициската и владејачката партија денеска разменија меѓусебни обвинувања околу визуелниот идентитет на настанот и начинот на неговата организација.
Од СДСМ обвинија дека на државната прослава било погрешно прикажано македонското знаме, оценувајќи го тоа како „срамно и понижувачко“. Од партијата побараа Владата да објави која компанија била ангажирана, колку пари биле потрошени за организацијата и кој ќе понесе одговорност за, како што велат, понижувањето на државниот симбол.
Од ВМРО-ДПМНЕ возвратија дека станува збор за уметничка инсталација во која повеќекрако сонце визуелно се претопува во македонското државно знаме со осум зраци. Според владејачката партија, СДСМ намерно се обидува да го оцрни настанот, иако, како што тврдат, спектаклот бил позитивно прифатен од граѓаните. Од ВМРО-ДПМНЕ порачаа дека манифестацијата „Силно светнал ден“ ја обединила државата и дека ќе продолжат со активности за одбележување на 35-годишнината од независноста.
