Вицепремиерот Александар Николоски вечерва присуствуваше на партиски настан во Ново Село, организиран од Општинскиот комитет на ВМРО-ДПМНЕ, каде што се сретна со претставници на македонската дијаспора, членови и симпатизери на партијата.
Во објава на социјалните мрежи, Николоски истакна дека настанот поминал во позитивна атмосфера и патриотски дух, посочувајќи дека со присутните разговарале за проектите што, според него, ќе придонесат за подобар живот и развој на државата.
Тој нагласи дека по иницијатива и барање на македонската дијаспора е воспоставена директната авионска линија Женева – Скопје, за која оцени дека ќе овозможи полесна комуникација и почести посети на иселениците во татковината.
Николоски најави дека Владата работи и на реализација на експресниот пат Радовиш – Струмица – Ново Село, оценувајќи дека станува збор за значаен инфраструктурен проект кој ќе ја подобри поврзаноста и ќе го поттикне економскиот развој на југоисточниот регион.
„ВМРО-ДПМНЕ е партија на народот, обединета и силна“, порача Николоски во својата објава.
