Премиерот Христијан Мицкоски на денешната собраниска седница одговори на пратеничко прашање поставено од лидерот на СДСМ, Венко Филипче, при што направи споредба меѓу економските показатели од времето на претходната власт и актуелните резултати на Владата.
Мицкоски оцени дека економските параметри бележат подобрување, посочувајќи дека инфлацијата е значително намалена, додека платите, пензиите и бруто домашниот производ растат со побрзо темпо во споредба со претходниот владин мандат.
Како пример, тој наведе дека инфлацијата во јуни 2026 година изнесувала 3,4 проценти, додека во јуни 2022 година достигнувала 14,7 проценти.
„Во јуни 2022 година Македонија беше осма по висина на инфлацијата меѓу 12 земји од регионот, а денес ја делиме третата позиција со Албанија со инфлација од 3,4 проценти. Тоа се факти“, изјави Мицкоски.
Осврнувајќи се на унгарскиот заем, премиерот истакна дека државата обезбедила финансиски средства под, како што рече, најповолни услови. Според него, половина од средствата биле искористени за отплата на еврообврзница во износ од 500 милиони евра, додека дел од преостанатите средства биле насочени кон субвенционирани кредити за компаниите со каматна стапка од 1,95 проценти.
Останатиот дел од заемот, како што посочи Мицкоски, се користи за реализација на инфраструктурни проекти во општините, вклучително и во оние каде што локалната власт ја предводи СДСМ.
