Предлогот за изменување и дополнување на Буџетот на Република Северна Македонија за 2026 година денеска повторно е пред пратениците. Дополнетиот ребаланс, во второ читање, се разгледува на 118. седница на Собранието, а согласно собранискиот Деловник, расправата може да трае најмногу три дена.
Владата минатата недела го усвои дополнетиот ребаланс, во кој се вградени амандманите прифатени од Комисијата за финансирање и буџет. Со нив се обезбедуваат дополнителни средства за жени кои вршат земјоделска дејност, за воспоставување национална СОС линија за жртви на родово и семејно насилство, како и за отворање и ставање во функција на два згрижувачки центри за жртви на семејно и родово базирано насилство.
Според предложениот ребаланс, вкупните приходи се планирани на 379,5 милијарди денари, додека расходите изнесуваат 425,8 милијарди денари. Од Министерството за финансии информираат дека дополнителните средства се распределени кон приоритетни области.
Со ребалансот се обезбедуваат повеќе средства за земјоделски субвенции, железничкиот сообраќај, спортот, како и за ученичкиот и студентскиот стандард. Предвидена е и дополнителна поддршка за најранливите категории граѓани преку социјални надоместоци, заштитни друштва, народни кујни, мерки за деинституционализација и здравствена заштита.
Зголемени се и средствата за капитални инвестиции, кои достигнуваат околу 46 милијарди денари, што претставува раст од 14,5 проценти во однос на иницијалниот Буџет. Истовремено, се предвидува намалување на расходите за стоки и услуги.
Буџетскиот дефицит е проектиран на 46,3 милијарди денари, односно 4,1 процент од бруто домашниот производ, додека економскиот раст е планиран на 3,5 проценти.
Министерката за финансии Гордана Димитриеска Кочоска оцени дека ребалансот ќе овозможи продолжување на економскиот раст, забрзување на инфраструктурниот развој и реализација на проекти што ќе донесат конкретни придобивки за граѓаните.
„Ребалансот претставува внимателен баланс помеѓу фискалната одговорност, потребата од забрзан развој и силен фокус на капиталните инвестиции. Со него се обезбедува стабилност на јавните финансии, но и услови за повеќе инвестиции, поголема економска активност и подобар животен стандард за граѓаните“, истакна Димитриеска Кочоска.
