Градежните работи на клучката кај Момин Поток се реализирани околу 75 проценти и се очекува проектот да биде целосно завршен до крајот на годината, по што значително ќе се намали сообраќајниот метеж и ќе се подобри безбедноста на овој дел од Скопје. Ова денеска го изјави градоначалникот Орце Ѓорѓиевски при увидот на терен, заедно со премиерот Христијан Мицкоски.
Ѓорѓиевски истакна дека пред седум месеци проектот бил речиси целосно запрен, со само десет проценти реализирана експропријација, додека денес таа постапка е целосно завршена и сите сопственици се обесштетени од страна на Град Скопје.
Тој нагласи дека станува збор за еден од најкомплексните инфраструктурни проекти во главниот град, кој покрај новата клучка опфаќа и изградба на два километри потпорни ѕидови, како и пешачки и велосипедски патеки.
Градоначалникот информираше дека паралелно се работи на уште пет мостови во Скопје. До крајот на годината треба да бидат завршени проширувањето на мостот на реката Серава и мостот на улицата „Љубљанска“, додека интензивно се изведуваат работи и на булеварот „Борис Трајковски“. Во август, пак, е најавен почетокот на изградбата на мостот што ќе ги поврзе општините Гази Баба и Аеродром.
Ѓорѓиевски потенцираше дека Владата обезбедила 60 милиони денари за изградбата на клучката кај Момин Поток, оценувајќи дека станува збор за еден од најзначајните инфраструктурни проекти што ќе бидат реализирани во Скопје.
Премиерот Христијан Мицкоски ја пофали работата на градоначалникот, посочувајќи дека за краток период е направен значителен напредок кај проекти кои претходно биле во застој.
Тој најави дека Владата до крајот на годината ќе обезбеди нова механизација за јавната хигиена во Скопје, меѓу која камиони, цистерни и метларки, а промоцијата на опремата се очекува до крајот на август. Освен Скопје, ваква опрема ќе добијат и повеќе поголеми општини во државата.
Мицкоски додаде дека се очекува да заврши и постапката за набавка на нови електрични автобуси, кои ќе бидат распределени во Скопје и во други општини.
Според премиерот, реализацијата на инфраструктурните проекти е во полн ек, а Владата ќе продолжи со поддршка на општините за исполнување на ветените капитални инвестиции, нагласувајќи дека иако не може преку ноќ да се надомести сè што било запоставувано со години, со посветена работа се постигнуваат видливи резултати.
