Цената на нафтата се искачи над 95 долари за барел за првпат во последните шест недели, откако повторно се зголемија тензиите во конфликтот меѓу САД и Иран.
Растот на цените следува по новите американски напади врз ирански цели, како и по заканите од Хутите дека ќе напаѓаат бродови во стратешки важниот теснец Баб ел Мандеб. Американскиот претседател Доналд Трамп најави дека нападите ќе бидат засилени доколку Иран продолжи со напади врз пловила во теснецот Хормуз.
Иран, како одговор на американските дејствија, изврши напади врз енергетска инфраструктура и постројки за десалинизација во соседните земји од Заливот. Генералниот секретар на Обединетите нации, Антонио Гутереш, ги осуди овие напади, нагласувајќи дека меѓународното право забранува напади врз цивилна инфраструктура, освен во случаи кога таа се користи за воени цели.
Според Трамп, САД ќе возвраќаат со уништување на стратешки објекти за секој напад врз бродови во Хормуз. Воениот конфликт досега, според американски проценки, ги чинел САД околу 37,5 милијарди долари.
Нафтата „брент“ во април достигна цена од 126 долари за барел, по што се намали на околу 71 долар на почетокот на јули. Новата ескалација повторно ја крена цената над 95 долари, што претставува најголем дневен раст од март.
Аналитичарите на „Голдман Сакс“ предупредуваат дека цената би можела да достигне и 120 долари до крајот на годината доколку не се обнови извозот преку Ормус. Сепак, Меѓународната агенција за енергија (ИЕА) смета дека пазарот засега останува стабилен благодарение на ослободувањето на околу 400 милиони барели од стратешките резерви и користењето алтернативни транспортни рути од Саудиска Арабија и Обединетите Арапски Емирати.
Иако зголемениот извоз од Европа и САД, како и послабата побарувачка од Кина, помогнаа да се намалат притисоците врз пазарот, проблемите со рафинираните производи остануваат сериозни. Според директорот на ИЕА, Фатих Бирол, производството на дизел и бензин е многу поограничено од снабдувањето со сурова нафта.
Дополнително, зголемениот извоз на природен гас од САД и Канада покри околу 70 проценти од загубите, но аналитичарите предупредуваат на можни проблеми во пресрет на зимата, кога европските земји ќе мора да ги наполнат складиштата.
Во меѓувреме, норвешката енергетска компанија „Еквинор“ објави дека остварила двојно поголем профит од 11,5 милијарди долари во вториот квартал, главно благодарение на високите цени на енергенсите.
