Владата преку Министерството за транспорт инвестира речиси 9 милиони евра во инфраструктурни проекти во Општина Велес, соопшти вицепремиерот и министер за транспорт Александар Николоски.
Николоски, заедно со премиерот Христијан Мицкоски, денеска беше во работна посета на Велес, каде што заедно со градоначалникот Марко Колев изврши увид во повеќе проекти кои се реализираат со поддршка на Владата и ресорното министерство.
Како што информираше Николоски, средствата се обезбедени преку Програмата за инфраструктурни проекти во општините, како и преку проектот што Владата го реализира со Светската банка.
„Ова е исклучително значајна инвестиција за развојот на инфраструктурата во Велес. Денеска гледаме почеток на работите на две улици, додека една улица веќе е завршена. Преку соработката со Светската банка веќе се реализирани три проекти во вредност од околу половина милион евра – улиците „8 Мај“, „Љубљанска“ и „Луј Пастер“, а завршена е и зградата со социјални станови“, изјави Николоски.
Тој нагласи дека поддршката за Општина Велес ќе продолжи и во иднина, преку нови проекти и инвестиции насочени кон подобрување на условите за живот на граѓаните.
„Ќе продолжиме со соработката со општината, градоначалникот, Советот и пратениците, со цел преку координација да обезбедиме уште повеќе проекти кои ќе бидат во интерес на жителите на Велес“, порача министерот за транспорт.
