Европската Унија од средината на 2027 година ќе воведе нови правила за заштита на патниците во воздушниот сообраќај, по повеќе од 13 години преговори меѓу земјите членки.
Најважната новина е дека останува правото на паричен надомест за доцнење на летот од најмалку три часа, доколку причината е на страната на авиокомпанијата. Висината на обештетувањето нема да се менува и ќе изнесува 250, 400 или 600 евра, во зависност од должината на летот.
Новите правила предвидуваат и дополнителна заштита за семејствата. Децата до 14 години ќе имаат право бесплатно да седат покрај своите родители, а истото ќе важи и за бремените жени и лицата со намалена подвижност кои патуваат со придружник.
Авиокомпаниите ќе бидат обврзани бесплатно да ги коригираат помалите грешки во имињата на билетите, како и да обезбедат печатење на бординг-карти без дополнителен трошок.
При подолги доцнења, патниците ќе имаат право на освежување, оброци, пристап до интернет, телефонски повици, а во одредени случаи и хотелско сместување.
Новите правила ќе се применуваат за сите летови што полетуваат од земјите членки на Европската Унија, без разлика на тоа која авиокомпанија го реализира летот.
