Изградбата на втората делница од автопатот Скопје–Блаце се очекува да започне во август и, според договорот, да трае околу четири години, најави директорот на Јавното претпријатие за државни патишта, Коце Трајановски.
Тој информираше дека проектот е обезбеден со грант во вредност од 30,8 милиони евра и заем од 167,6 милиони евра. Новата делница ќе биде долга 10,5 километри, а заедно со претходно изградените 1,5 километри, автопатот од клучката Стенковец до граничниот премин Блаце ќе има вкупна должина од 12 километри.
Според Трајановски, трасата минува низ ридско-планински терен во пределот на Скопска Црна Гора, што ја прави изградбата особено сложена. Поради тоа, проектот предвидува изградба на пет двоцевни тунели со вкупна должина од околу пет километри, девет мостови со должина од 2,5 километри, 11 надвозници, четири галерии за стабилизација на косините и девет потпорни ѕидови.
„Теренот е ридско-планински и е дел од масивот Скопска Црна Гора. Ова е исклучително тежок терен за градба. Затоа проектот предвидува пет двоцевни тунели, девет мостови, 11 надвозници, четири галерии и девет потпорни ѕидови. Очекуваме изградбата да започне во август оваа година. Според договорот, периодот на изградба е приближно четири години. Избран е консултантот, избран е изведувачот, додека надзорот е во фаза на евалуација и очекуваме наскоро да биде избран“, изјави Трајановски.
