Во повеќе населби на територијата на Општина Карпош во тек е обновување на чешмичките за пиење вода. Од општината информираат дека во изминативе денови старите и нефункционални чешмички се заменети со нови на неколку локации.
Нови чешми за пиење вода се поставени во населбите Бардовци, Карпош 3 и Влае, како и на плоштадот „Делфина“.
Од Општина Карпош посочуваат дека станува збор за замена на постојни објекти кои биле оштетени, нефункционални или целосно неупотребливи.
„Станува збор за постојни чешми што беа нефункционални, скршени и не беа во состојба за користење. Целта на оваа акција е карпошани да имаат достапна вода за пиење и да може да се разладуваат во овие топли летни денови“, информираат од општината.
Акцијата за замена и поставување на новите чешмички ја реализира фирмата „Хидротек“, а средствата се обезбедени преку програмата на Секторот за екологија и енергетска ефикасност на Општина Карпош.
